Հնդկաստանում ՀՀ դեսպան Վահագն Աֆյանի մասնակցությունը Սուրաջկունդի արհեստների 38-րդ միջազգային փառատոնի բացմանը

07 փետրվարի, 2025

Փետրվարի 7-ին Հնդկաստանում ՀՀ դեսպան Վահագն Աֆյանը մասնակցել է Սուրաջկունդի արհեստների 38-րդ միջազգային փառատոնի բացմանը, որին Հայաստանն այս տարի ևս ներկայացված է առանձին տաղավարով:

Մինչև փետրվարի 23-ն անցկացվող այս տարվա փառատոնի բացմանը ողջույնի խոսքերով հանդես են եկել Հնդկաստանի մշակույթի նախարար Գաջենդրա Սինգհ Շեկավաթն ու Հարյանայի նահանգապետ Նայաբ Սինգհ Սայնին:

Հնդկաստանի Հարյանա նահանգի Ֆարիդաբադ քաղաքին հարող տարածքում անցկացվող ամենամյա այս միջոցառմանը վերջին մի քանի տարիներին ավանդաբար մասնակցություն են ցուցաբերում Հովհ. Շարամբեյանի անվան ժողովրդական արվեստների թանգարանի «Արար» ծրագրում ընդգրկված ասեղնագործության և գորգագործության վարպետներ, ովքեր ներկայացնում են հայկական գործվածքը՝ կարպետներ, ասեղնագործ և թաղիքից պատրաստված աշխատանքներ, դեկորատիվ-կիրառական արվեստի նմուշներ, հուշանվերներ: Հայաստանի տաղավարում իրականացվում են նաև ձեռագործ աշխատանքների վարպետության դասեր:

Միջմշակութային և ժողովրդական ստեղծագործության փոխճանաչելիության բարձրացմանը միտված «Արևի լիճ» կոչվող փառատոնին ցուցադրություններով մասնակցում են ինչպես Հնդկաստանի տարբեր նահանգներ, այնպես էլ՝ հինգ տասնյակից ավել երկրներ:

Փակման արարողությանը Հաաստանն առաջին անգամ արժանացել է «Լավագույն օտարերկրյա տաղավար» 2-րդ մրցանակի, որը «Հովհ. Շարամբեյանի անվան ժողովրդական արվեստների թանգարան» ՊՈԱԿ-ի վարպետ՝ ասեղնագործուհի Արմենուհի Խաչատրյանին է շնորհվել Հնդկաստանի բնակարանային և քաղաքային հարցերի նախարար Մանոհար Լալ Խաթթարի կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր